পণবন্দী জনতাৰ আৰ্তনাদ

পণবন্দী জনতাৰ আৰ্তনাদ

(সকলোলৈ ইংৰাজী নৱবৰ্ষ ২০২৫ ৰ শুভেচ্ছাৰে)

 

দিগন্ত লৃচাং পেগু

আকৌ এটি বৰ্ষ পাৰহৈ গ’ল

গমকেই নেপালোঁ

আমাক অপহৰণ কৰি পণবন্দী কৰা৷

জীৱনদায়িনী ঔষধৰ নামত

দহটকা দাম বৃদ্ধি কৰি, তিনি টকা কমাই দিলে৷

আশী টকাৰ পেট্ৰল এশটকালৈ বৃদ্ধি কৰি

দুটকা কমাই দিলে৷

আমি কোচ, একেবাৰে দিলকো৷

পেট্ৰল কিনিব নোৱাৰিলেও

কান্ধত বাইকখন দাঙি লৈ যাম,

আমি সাৰে-হিমজুৱে সমৰ্থক!

 

অধিক মূল্যবৃদ্ধি হ'লেও মদিৰাকে পান কৰিম

তথাপিও “গাখীৰ নেখাওঁ”

আমিয়েই যে দেশৰ সচেতন “প্ৰজা”৷

প্ৰকৃত দেশপ্ৰেমীক৷

 

বজাৰত খাদ্য সামগ্ৰীৰ আকাশলংঘী মূল্যবৃদ্ধি হ'লেও

অখাদ্যকে খাদ্য বুলি দুগুণ মূল্যত কিনি খাম৷

আমি প্ৰতিবাদ নকৰো৷

আমাৰ ভালেই চলি আছে। আৰু এনেকৈ চলি থাকিব৷

 

উন্নয়নৰ নামত দুশবছৰীয়া হাজাৰ জোপা গছ কাটিলেও, আমি প্ৰতিবাদ নকৰো৷

আৰু উন্নয়নৰ নামন মোৰ ঘৰৰ ওপৰত বুলডজাৰ চলালেও

আমি প্ৰতিবাদ নকৰো৷

তেখেতৰহে গৈছে ?

মোৰ কি আহে বা যায়৷

 

আকৌ এটি বৰ্ষ পাৰহৈ গ’ল

গমকেই নেপালো

ৰ’দ-বৰষুণ কি- বোকামাটিৰ গোন্ধ- বানপানী কি ?

আমি যে হিতাধিকাৰী

প্ৰতিমাহে বিনামূলীয়া চাউল পালো

বেংকৰ একাউণ্টত নিজে নিজে ধন সোমায়৷

বান-বাৰিষাত সৰ্বস্বান্ত হ’লেও

চৰকাৰে দিয়া “আদৰ্শ বান শিবিৰ”ত থাকিলোঁ৷

আমাৰ এতিয়া একো অভাৱ-সমস্যা নাই।

 

ৰজাই আয়োজন কৰা প্ৰটিতো সভালৈ

আমাক নিমন্ত্ৰণ কৰি গাড়ীত লৈ যায়, থৈ আহেহি

আমি দিনৰদিনটো

জিন্দাবাদ! জিন্দাবাদ! চিঞৰো৷

সন্ধিয়াটো আৰু অধিক ৰঙীন কৰিবলৈ

আমাৰ নেতা দাদা সতে পাঁচশৰ পৰা পোন্ধৰশ টকালৈ

খমখমীয়া নোট হাতত গুজি দিয়ে, কিহৰ চিন্তা এতিয়া৷

কোনে পায় আমাক ???

 

গাঁওখনৰ সিখন চুবাট সভা এখন পাতিলে

আনখন চুবাট আমাক বৃহৎ চোৱৰ এটা মাৰি খোৱায়৷

লাগিলে এনেই খাই থাক৷

প্ৰয়োজনত আৰু দিম, আৰু ধেৰ কিবাকিবি

 

কিন্তু---

কিন্তু, সেইখন চুবাটোৰ সভাটোলৈ নাযাব৷

গ’লে---

মোৰ পাইজামাটোৰ নাড়াডাল খুলি নাঙঠ কৰিব পাৰে মোক৷

 

এনেকৈয়ে আকৌ এটি বৰ্ষ পাৰহৈ গ’ল৷

গমকেই নেপালোঁ

কেতিয়া আমক অপহৰণ কৰি পণবন্দী কৰিলে৷

 

চাবা বন্ধু,

আগন্তুক বৰ্ষটো ইহঁতে আমাক অপহৰণ কৰি

পণবন্দী জনতাৰ মুকলি দিয়িৰ বাবত

আকৌ ধন দাবী কৰিব৷

কৃপণৰ পিয়লাৰে দি

ধনীক শ্ৰেণীৰ বণিকৰ হাতত গটাই দিব৷

 

আকৌ এটি বৰ্ষ পাৰ হ’ব৷

কোনে শুনিব---

পণবন্দী জনতাৰ আৰ্তনাদ ???

কোনে শুনিব---

পণবন্দী জনতাৰ আৰ্তনাদ ???