ABU NOM MÉ:PA:LA

 

ABU NOM MÉ:PA:LA

 

(Po:sum Suren Dole: mé mé:tomla)

 

Seniram Pangggíng

 

Ru:né bí ru:tagai nom tani: aopé

Abu ané bí otagai  Miro-miga:pé

Kumdang da:la í:ré-pongkírpé

Ope: érangém pu:po-jarpodopé.

Léngkan bitagai kampon bédangém.

Tuptalok angkirém titpaksuge:la

Léppo índopé bésíg sígla

Kinsumoma:pé ngasodém ngolum

Dolíngém domola gélíngém gémola                   

Abu no usa:tagai ngolum.

Abu nok gerbomnam  agerém

Nok mé:lod gílodém

Ngo silo mitpanmang .

Do:nyi Pédong kinma:pé  lakpo índopé

Pakur kurra  amro aríg  po:yubdo ngatursula

Abu no ngom  tani: aopé  moge:la

Siloké longéso ngolum mépagla

Édílosin gílad kuma:nam lambélok gíkangku.  

Abu no kakuma:la péri: péri:pé miksé biddung

Do:nyi Po:loké kamponé amo:to 

Asé:la du:dopé kumlígdung.

Daktog dagdung émma:pé takamém

Du:jon dagjonna réngamém  lékopé

Agom gompirém kebbug gamikpé

Agom kumsu:lo kebbito.

Mibu a:bang, leke ni:tom                                   

Sí:sang ajon émnam do:yar potiném adlenbitagai.

Do:sog paksong, mé:tom, kabané

Réngamso du:yaryé.

Nom silo ngo mikpanmang.

Adi: di:té:tokké toglenna gíné aying amo:so

Mising émsumoné ,do:ying adbiné

Gomlab abu nom kapésin mitpanmang.

Bogum sí:lung ara:dok yumé loladdo

No Po:lo takarpé un-yarra du:yé

Do:nyi Po:lo angun béda:lo.

Do:nyi Po:lo angun béda:lo.