Horish Dole:
Ayang!
Appíngké
tadlí:nam, appíngké goglí:nam, appíngké aya:nam aminé Ayang dé. Lésin-
laksinlo:pé kangkané Ayangbí. Akon-asagé ludag, ko:néng koném abudém
oladdantakku émna. Ta:to-ya:yodokkébo ila ka:nédéi Ayangmé ayangé émna mé:ma:né
kama. Kangkanéla abudok appíng ilod-gílodém gésudag émna Ayangmé aí adin takamé
amo:lo mépéi talé:lo mépéi émna idag. Édémpiné ayangkídí:dém pa:la bík
jarsuésin béjédag.
Kasmir amo:lo
abné pané opeyé bo:mém bugla bukketo bík abu Mékongmé. Odo bí bík anéké aki:lo
dungngai. Émpila Ayangbí abudém kangkítoma. 'Army' pé ila sinamé lo:yid
Mékongké né:ng - ommang léga:pé émna Bharot mo:rum migomé ka:dumsunam aminlok
murkong 25 lakh ko binam murko:dokki Ayangké ané Oiséngbí dukan ko moge:la
kolen koa:dokki omé atérdém ai-kangkanpé pori-unimola ami kangkurkosuma:pé
turra dung.
Ape: appi:lo pola
du:né Ayangké kinjo:né pin-yodém anna bím appíngéi aipé pomolang émna odokké
"Laptop" manggom mobailko la:bige:la "Google " lok
aipé poyirsumoge:la "TV chanal" kolo gíbola bík kinnamém léngkanmokílang
émna anédém lutíkolo anédé asino:dokki aropé atér omésém imokímílo:pé émna
mé:namko édílailokkébo mé:la dung. Ayangké anédé Ayangbí ape: appi:dém
pokurmíloi mobail akodaggom rébipébo émna mé:la dungko ara:do Ayangbí ape:
appi:dém 99% kopé nomborém pa:la pokurto. Milbongé sila mé:dír miksé
bidngasuma:né Ayangké ané Oisengbí sagí gínamdém mikpan-ge:la méngkí:ma:nam
mé:poko asindé géropkang. Édé mé:podokki omé Ayangmé gíbodanna mobail ako
rébito. Anu mobailko bík atég léga:pé pa:la
okkomsin kinsu:ma:né Ayangké mé:potéré katoma. Pogolo kompiutar
poyirnamlok kinna ménam odokké anèdok mobaildém ní:manna du:dolok ní:yirsunam
kídí:dokki bí lomdanna mobaildém ní:jongkang. Édé ara:do "Google" lok
okkom kapé ka:pénamméji odokké oko okkom ka:la:dagji édém bí bík ka:kí
Migolkolok ka:yirsula métag.
Ayangké sí:rumé
10 dítakkopé idagbo. Pori unilok mo:légdok tadgénammé. Pori kindag émna poyir
abbosin bím airu:pé aya:dag. Anédé dukanlo du:namé Ayangbí pogolo du:dagdok
angupé mobaildèméi ajonpé jonna ní:manna du:dag. "Facebook"
"WhatsApp" émsin bí ní:lenna métag. Ajon arumém odokki
lupo-taunala:dag émnamémsin bî kinapka:bo. Bí mo:písok béjéko taunamlok luladém
kindu:bo. Édé ara:do bî sinema odokké andé:né "video" kídí;démsin
ka:tíla du:namé ka:ma:pé du:la:ma:pé irobdung. Anédé luyém pori:du:ma:lang émna
luya:sula du:dag. Émpige:la bí bík pogolok potinéméi ka:lí:ma:pé irobdung.
Poyir abubuluk Ayangké porinam aima:pé ila gínamém anédém lupa:nammém bí
aídé:sin tatsudag. Émdaggom bí mobaildém méla:ma. Anédé mobail ka:baddag émna
lékoném lé:subiyémílo Ayangbí a:ng gèla apin doma:pè du:dag. Édém ka:la anédé
bím mobaildém bige:kula luyum lupola apindém domopa:dag.
Mobail kangésula
aipé ponam pomang ara:do Ayangbí dítag ankangém bito. Appíngké aya:nam Ayangbí
amig aipé ka:pa:ma émna lula anka:dém aipé méngkampé bila:toma. Édémpe ikolo
édílosin ankang aima:pé ikí:ma:né Ayangbí ape: appi:nanédo ankang aitoma émna
lutadém pa:to. Édé lutaddokki anédé omédém kablígdanna aigampé ge:to. Ayangbí
anédém kinsudagdokké édémpé gengkosukímangngai. Bík asindé édé ge:namdém
mé:metsula:toma. Édémpé ikolo édé yumédo bí yo: kídusudodo:pé asin arango:dokki
kabnonoma:pé kabla du:to. Gerkoksula du:né ané Oisengbí yummi:ki yubla dungkolo
okodémsin kinsutoma.
Rokomdo
darobgorge:la anédé Ayangmé luto, "Nom mobailém ka:yoka émma. Émdaggom
ka:díko kangge:la aíké gerpénammém gerpa:yé. Mobaillo ainékolang aimangko
kadung. Ainong kídí:dém ka:mílo amig aimanggédopé no ka:la:ma:yé. Odokké ainé
do:yingémsin no béjéko kinna:yé." Anédok agom lula dungko ara:do Ayangbí
kapsangkang, "Oua ngok amiksé ka:so-ka:monèmpé idung. Ngo aipè ka:pa:ma:pé
idung. Bík édé agomdém taddan-ge:la ro:dok apindém dogorge:la Ayangmé daktorpé
émna gíboto. Daktor Migombí appí:pé Ayangmé tíkang anka:la kangge:la Ayangké
ané Oiséngmé kangge:la ge:robbomkang, "No nok omésém aipé mobail ka:modung
ai? Kapé no omé atérdém édémpé mé:sa-mé:yalangkan? No sék légangé éddíko
murkong madun, omé atèrdéméi aimoma:pé? Bí sémmo:pé itíla du:mílo amigdé
miglupagyé."
Daktordok agomdém tadla Oiséngbí sagídém bagémpé gíropkang. Édé sagídém Ayangbí anédok tattítag. . Édém tadge:la anédém silígdanna aipé mé:né Ayangké amigdokké miksiya:ya:pé ila anédém lékoda édémpiné imurém ige:ma:bo émnamémpé séudém moropkang. Oné ané Oisengbí édém ka:ra:sula:ma:la omèdém kíngí:-tarí:pé gonggapto.#
0 Comments