ANÉ AGOMKÉ ARÉ
Horish Dole:
Agomé sinané agomé turnané. Agomé kama:mílo
tani:ké turnamésin símín akamé. Mo:píso agomé béjéko kadung. Agom agom émdaggom
sé mo:píso ané agomém dérya:né kama.
Lukéng kané gompirkídí:dém tíkumsula asin
ara:bok mé:namdém akoné tatkinla:dopé lukansunamdéi agomé. Mo:píso opín
takamlokké aíké agomé kasudung. Édé agom takamdéi aísuapé tatposudung. Émdaggom
odok aíké ané agomdémpé tatponé, luponé, asinang okannammé kama. Mo:píso opín
ako émna léngkansunané léga:pé agomdé kapo:pé idag. Odokpakké dírbí, yélamdé.
Rajniti:dém ami mo:rumlo dungge:la ami agom luge:la:sin ila:dag. Lukanmílo
Amerika, Inglendlo Bharot sok taniyé buluk agom luge:la rajniti ila dung..
Émpige:la aíké agom kama:mílo opín ako émna léngkansupé ngasoddag.
Ané agomdé mo:písém kangkinsuné, asin agom
kíbisugodnanné. Édémpila mo:písok béjéko kinjígné taniyé ané agomém kéla agomém
ludag.
Mohadma Gandhi ké lukampé,
"Ojíng ko:dok amír-amo ainam léga:pé kapé kirrongdém tí:pa:dagji édémí:pé
tani:lok pin-yo burnam léga:pésin ané agomki poyirnamdém ipa:dag."
Nelson Mandela ké lukampé, "No tani:
akoném bík tatkinnam agompé luposumílo édé bík pin-yopé pí:yé, odokké no bík
ané agomki luposumílo édé bík asindo:pé pínga:yé."
Ané agomém kéla luné kinjígné akone Dr. A
P J Abdul Kalam bí. Bík lukampé, "Mé:lensunanéné asindé a:péne adílok
pagbannanélok sabiyé, odokké édém pobug pogolo ané agomki poyirge:la
langa:la:do."
'UNO' ésin ané agomsém kéla lunamé kadung.
Bulu 1953 do:boi ko:kang pin-yo burmonam légangé mo:písok mo:rum takamé pobug
pogolo ané agomki poyirnammém ilangka émna lukaném lutag.
Mo:píso aro tani: émsunapé aí kangkiném turmoru:pa:yé. Nérí:tu:ying kama:né tani:dém éddíkoi kindaggom akoné lupu-lure:ko luyérung. Aí kangkindem léngkansuané ané agomdem turmola:mílopag tani: koné bík aro kinnamdok arédém pa:yé. Émpilai ru:nébí angu angu opíném ru:len-ge:la aíké aíké agomém bitag. Aí agomdém mosí:sula turmokinma:né opíné mo:píso turra dungge:la:sin sinam akampe ila dung. Émpila aíke ané agomdok arédém kinsula mésí:sunamdé aro kinjígné tani:lok ilodé. Émam manggo:né néyangémpe akon dagrasuné ísí:lo ma:sa:la dagrasumínnammémpé iyé. Odo ísí:dé dírmíloi dírmínpa:yé.#
0 Comments