KARYUG KARYUGLA KARBOMKANGKU BÍ NGOK ASIN IN-YOPKO

KARYUG KARYUGLA KARBOMKANGKU

BÍ NGOK ASIN IN-YOPKO

 

Mg Bhobo Dole:

 

Kémo-píang  rísondok ri:ri takom kaptérdo

Dagdu:p dugné re:ldé nganosula rotumkang

Nérpeletsula gi:-gísa:dung tani:é odo

Re:ldé ni:tom mola mola dugropkang .

Pílí pílín ésaré yabru aru:dok yuala

Moyongo:né ui méram dumsíg géné mímbírdok

Dumsor sorné dumuddé

Ngok mikmosok ri:yid-ringkodla dosukkang

Ngo bím ka:nonoma:pé ka:tíl du:dodo

Badam badam émna ko:red rednéko redado

Bí badamdém karyug karyugla dogela

Ngomsin doyenéi émdagai ?

Ngo doge:mang émto !

To:téréré:pé ...

Tapungko mudla mudla

Mo:pí lolad ka:pama:né mopunlok

Ni:tom to:ríko yeru:so yingakang

Líkkepsok murkong  abarko pa:to

Toka:né alagdo lé:lík bito

Ru:nébí aya:téika émge:la gíbatkang.

Léddardo tungkuliné míjí:ko kogola gíado

Yugo: yugo:danna yupa:to líkkebdok anír:ko

Ru:ném kumge:la bím bito

Bí mé:podanna la:ríksula bomkangku.

Ni:tom -kaban kabla kabla dugge:la

Re:ldé ngarasula rotumkang

TomTom ,rangkob ga:ri  dukkumsukang

Gasum-basum ru:ru:la tani:yé gi:-gísa:dung

Bí:sin kinsouma:pé bai bai émkang

Ngok asinso kongkíd ko:matkang

Karyugla karbomkangku ngok  asin in-yopko

Ki:tun tundo turdíso:sin

Amiksé bíggongkolo dungkang.